آرمی چیف جنرل سید عاصم منیرکو فیلڈ مارشل کے عہدے پر ترقی دی گئی
اسلام آباد: وفاقی کابینہ نے آرمی چیف جنرل سید عاصم منیر کو فیلڈ مارشل کے عہدے پر ترقی دینے کی منظوری دے دی،اعلامیے کے مطابق آپریشن بنیان مرصوص کی اعلی حکمتِ عملی اور دشمن کو شکستِ فاش دینے پر جنرل عاصم منیر کو فیلڈ مارشل کے عہدے پر ترقی دی گئی ہے۔
کشمیرمیڈیاسروس کے مطابق ا یئر چیف مارشل ظہیر بابر سدھو کی مدتِ ملازمت پوری ہونے پر ان کی خدمات جاری رکھنے کا بھی متفقہ فیصلہ کیا گیا ہے۔اعلامیے میں کہا گیا ہے کہ بنیان مرصوص کے دوران گراں قدر خدمات انجام دینے والوں کو اعلیٰ سرکاری ایوارڈ دیا جائے گا اور آپریشن بنیان مرصوص کے غازیان اور شہدا ء کو اعلی سرکاری اعزازات سے نوازا جائے گا۔وفاقی کابینہ نے کہا ہے کہ آرمی چیف کی بے مثال قیادت کی بدولت پاکستان کو معرکہ حق میں تاریخی کامیابی ملی، جنرل عاصم منیر نے مثالی جرات اور عزم کے ساتھ پاک فوج کی قیادت کی اور مسلح افواج کی جنگی حکمتِ عملی اور کاوشوں کو بھرپور طریقے سے ہم آہنگ کیا۔وزیرِ اعظم شہباز شریف نے صدر مملکت سے ملاقات کر کے انہیں اس فیصلے کے حوالے سے اعتماد میں لیا۔ پاکستان میں جنرل عاصم منیر دوسری شخصیت ہیں جنہیں فیلڈ مارشل بنایا گیا ہے، ان سے قبل صدر جنرل ایوب خان 1959 میں فیلڈ مارشل بنے تھے۔فیلڈ مارشل آرمی میں جنرل کے رینک سے اوپر سب سے بڑا عہدہ ہے، جو آرمی افسران میں سب سے زیادہ سینئر فائیو اسٹار افسر ہوتا ہے، یہ اعزاز مسلح افواج میں غیر معمولی اور مثالی قیادت کے تناظر میں دیا جاتا ہے۔
