لاہور:
بھارت میں دیوالی کے تہوار کے باعث خطے کی فضا میں آلودگی تیزی سے بڑھ رہی ہے جس کے اثرات سرحد پار پاکستان کے مشرقی شہروں تک پہنچ رہے ہیں۔
کشمیرمیڈیاسروس کے مطابق لاہور میں پیر کی صبح ائیر کوالٹی انڈیکس 287جبکہ قصور میں 331، شیخوپورہ میں 311، فیصل آباد میں 277، گجرانوالہ میں 178اور ملتان میں 204ریکارڈکیاگیا۔ پنجاب میں فضائی آلودگی کے لحاظ سے قصور پہلے، شیخوپورہ دوسرے اور لاہور تیسرے نمبر پر ہے۔ عالمی ماحولیاتی ادارے آئی کیو ایئر کے مطابق بھارت سے آنے والی فضائی آلودگی کے باعث لاہور اس وقت دنیا کے آلودہ ترین شہروں میں پہلے اور بھارتی دارالحکومت دلی دوسرے نمبر پر ہے، لاہور کا اے کیو آئی 298 اور دلی کا 283 ریکارڈ کیا گیا۔ دیوالی کے موقع پر سرحد پار سے آلودہ ہوائیں لاہور میں داخل ہونے کے خطرے کے پیش نظر اینٹی اسموگ گنز کو فعال کر دیا گیا ہے ۔محکمہ ماحولیات کے مطابق امرتسر، لدھیانہ اور ہریانہ سے آنے والی آلودہ ہوائیں لاہور، فیصل آباد، ساہیوال، بہاولپور، رحیم یار خان اور ملتان کی فضا کو متاثر کریں گی۔ پنجاب اسموگ مانیٹرنگ سینٹر نے شہریوں کو احتیاطی تدابیر اختیار کرنے کی ہدایت کرتے ہوئے کہا ہے کہ ماسک پہننے کو معمول بنایا جائے، اور بچے، بزرگ اور سانس کے مریض غیر ضروری طور پر گھروں سے باہر نہ نکلیں۔سینئر صوبائی وزیر مریم اورنگزیب نے کہا ہے کہ اسموگ سے بچائو اور کمی کے لیے ہر شہری کا کردار اہم ہے۔ انہوں نے شہریوں سے اپیل کی کہ ماحولیاتی ایس او پیز پر عمل کریں اور حکومت کے اقدامات میں مکمل تعاون کریں تاکہ آلودگی پر قابو پایا جا سکے۔
