پاکستان کا کشمیریوں ،فلسطینیوں کی دلیرانہ جدوجہد کی حمایت جاری رکھنے کے عزم کا اعادہ
اسلام آباد:
پاکستان نے بھارت کے غیر قانونی زیر قبضہ جموںوکشمیر اور فلسطین کے محکوم عوام کی دلیرانہ جدوجہد کی حمایت جاری رکھنے کے عز م کا اعادہ کیا ہے۔
نگراں وزیر خارجہ جلیل عباس جیلانی نے آج انسانی حقوق کے عالمی دن پر اپنے ایک پیغام میں کہا کہ پاکستان مقبوضہ جموں و کشمیر اور مقبوضہ فلسطین کے لوگوں کے ساتھ مکمل یکجہتی کے ساتھ کھڑا ہے۔ انہوں نے کہا کہ قابض طاقتیں انسانی حقوق کے بین الاقوامی قوانین کو نظر انداز کر تے ہوئے کشمیریوں ، فلسطینیوں پر بدترین مظالم ڈھا رہی ہیں لیکن وہ ان کی خواہشات کو کبھی نہیں دبا سکتیں۔
انہوں نے کہاکہ پاکستان کی سول سوسائٹی، میڈیا اور قانونی ادارے تمام شہریوں کے حقوق اور آزادیوں کے حوالے سے حکومت کے متزلزل عزم کو تقویت دیتے ہیں۔
انہوں نے کہا کہ پاکستان کشمیری اور فلسطینی عوام کی دلیرانہ مزاحمت اور ان کے حق خود ارادیت کے لیے اخلاقی، سفارتی اور سیاسی حمایت جاری رکھے گا۔
