دریائے جمنا میں کشتی الٹنے سے 2بھارتی فوجی لاپتہ
نئی دہلی: بھارتی ریاست ہریانہ میں ہتھنی کنڈ بیراج پر دریائے جمنا میں فوجی کشتی الٹنے سے دو فوجی لاپتہ ہوگئے۔
کشمیر میڈیا سروس کے مطابق یہ واقعہ بیراج پر کی جانے والی مشترکہ واٹر مین شپ تربیتی مشق کے دوران پیش آیا۔
ایک سرکاری بیان میں کہا گیا ہے کہ تربیتی مشق کے دوران کشتی بیراج کے نیچے کی طرف تیز دھارے میں پھنس گئی۔ کشتی کو نکالنے کی کوششیں کی گئیں، لیکن یہ سلائس گیٹ کے ارد گرد مضبوط کناروں میں پھنس گئی اور بعد میں الٹ گئی، جس کے نتیجے میں عملے کے دو ارکان بہہ گئے۔
بیان میں عملے کے دو ارکان کے لاپتہ ہونے کی تصدیق کی گئی ہے۔واقعہ یکم ستمبر کو پیش آیا۔
لاپتہ فوجیوں کی تلاش کے لیے بھارتی فوج، فضائیہ، مقامی پولیس اور سول انتظامیہ پر مشتمل مشترکہ تلاشی آپریشن تاحال جار ہے۔
یہ واقعہ اس طرح کی مشقوں میں شامل اہلکاروں کی پیشہ ورانہ مہارت اور تیاری کے بارے میں بھی سوالات اٹھاتا ہے، کیونکہ ناکافی تربیت، مہارت یا آپریشنل تیاری ہائی رسک واٹر مین شپ سرگرمیوں کے دوران خطرات کو بڑھا سکتی ہے۔
