بہار:پٹاخوں کی فیکٹری میں دھماکے سے 10افراد ہلاک

بھاگلپور04مارچ (کے ایم ایس)
بھارتی ریاست بہار میںایک بڑے دھماکے میں کم سے کم 10افراد ہلاک اور 9زخمی ہو گئے ہیں ۔
ریاست کے ضلع بھاگلپور میں ایک گھر میں دھماکے سے ایک بچے سمیت10افراد ہلاک اور 9زخمی ہو گئے ہیں ۔ دھماکہ اتنا شدید تھا کہ اس کی گونج دور دور تک سنی گئی۔ حکام کے مطابق گھر میں غیر قانونی طورپر پٹاخے بنائے جاتے تھے ۔ ڈسٹرکٹ مجسٹریٹ بھاگلپور سبرت کمار سین نے کہاہے کہ یہ دھماکہ جمعہ کو صبح سویرے ضلع میں کبالیچک کے علاقے مہیندرا منڈل کے ایک گھر میں ہوا۔ انہوں نے کہاکہ دھماکہ اتنا زوردار تھا کہ اس سے دو ملحقہ عمارتیں بھی زمین بوس ہو گئی ۔ انہوں نے بتایا کہ اب تک 10 لاشیں نکالی جاچکی ہیں اور ان کی شناخت نہیں ہو سکی ہے جبکہ 9زخمیوں کو ہسپتال منتقل کیاگیا ہے ۔