مقبوضہ جموں و کشمیر
مقبوضہ جموں وکشمیر: کولگام میں بھارتی پیراملٹری کی گاڑی پر دستی بم سے حملہ
سرینگر 26اپریل (کے ایم ایس) غیر قانونی طور پربھارت کے زیر قبضہ جموں و کشمیر میںنامعلوم مسلح افراد نے منگل کو جنوبی کشمیر کے ضلع کولگام میں بھارتی پیراملٹری سینٹرل ریزرو پولیس فورس( سی آر پی ایف)پر دستی بم سے حملہ کیا۔
کشمیرمیڈیا سروس کے مطابق حملہ ضلع کے علاقے برزلو میں سی آر پی ایف کی ایک گاڑی پر کیاگیا۔ایک اعلیٰ پولیس افسر نے سرینگر میں صحافیوں کو بتایا کہ مسلح افرادنے سی آر پی ایف کی گاڑی پر دستی بم سے حملہ کیا۔دستی بم زور دار دھماکے سے پھٹ گیا، تاہم واقعے میں کسی جانی یا مالی نقصان کی کوئی اطلاع نہیں ملی۔ بھارتی فورسز نے حملہ آوروں کو پکڑنے کے لیے پورے علاقے کو محاصرے میں لے لیا ہے۔
