دہلی کے ہوٹل میں خاتون کو اجتماعی زیادتی کا نشانہ بنایاگیا
نئی دہلی 12اکتوبر (کے ایم ایس)بھارت میں خواتین کے خلاف ایک اور جرم میں بھارتی دارالحکومت نئی دہلی میں ایک 32سالہ خاتون کو اجتماعی زیادتی کا نشانہ بنایا گیا۔
کشمیر میڈیا سروس کے مطابق پولیس نے بتایا کہ شمال مغربی دہلی کے علاقے آدرش میں تین افراد اجے، تارا چند اور نریش نے ایک ہوٹل کے کمرے میں خاتون کو زیادتی کا نشانہ بنایا۔ڈپٹی کمشنر پولیس اوشا رنگنانی نے صحافیوں کو بتایا کہ اتوار کو آدرش نگر پولیس اسٹیشن میں اس واقعے سے متعلق ایک کال موصول ہوئی۔ انہوں نے کہا کہ خاتون نے اپنے بیان میں کہا ہے کہ اسے اس کے جاننے والے اجے نے اتوار کو ہوٹل کے ایک کمرے میں بلایا تھا جہاں اس کے دو دوست بھی موجود تھے۔ڈی سی پی نے کہا کہ انہوں نے مبینہ طور پر خاتون کو کولڈ ڈرنک کی پیشکش کی اور وہ اسے پینے کے بعد بے ہوش ہوگئی۔ اس کے بعد تینوں نے خاتون کی عصمت دری کی۔انہوں نے کہا کہ متاثرہ خاتون کے بیان کی بنیاد پر ملزمان کو گرفتار کیا گیاہے۔
