بھارتی حکومت نے کشمیری عوام کے خلاف اعلانِ جنگ کر رکھا ہے: شاہد سلیم
جموں 22جنوری(کے ایم ایس) غیر قانونی طور پر بھارت کے زیر قبضہ جموں و کشمیر میں کل جماعتی حریت کانفرنس کے رہنما میر شاہد سلیم نے کہاہے کہ بھارتی حکومت نے کشمیری عوام کے خلاف اعلانِ جنگ کر رکھا ہے۔
کشمیرمیڈیا سروس کے مطابق میر شاہد سلیم نے جموں میں ایک تقریب سے خطاب کرتے ہوئے کہا کہ قابض حکام آئے روز ایسے فرمان اور حکم نامے جاری کررہے ہیں جن کا مقصد کشمیری عوام کو نہ صرف سیاسی طور بے اختیار بنانا بلکہ انہیں اقتصادی،تہذیبی اور ثقافتی طور پر نشانہ بناناہوتا ہے ۔ حریت رہنمایاسمین راجا نے تقریب سے خطاب کرتے ہوئے کہا کہ کشمیری خواتین انسانی حقوق کی خلاف ورزیوں کی بد ترین شکار ہیں ۔ تقریب سے جن دیگر مقررین نے خطاب کیا ان میں شبیر راتھر، محمد یوسف لون، مقبول احمد گنائی ،ایڈوکیٹ ایاز مغل اور قاضی غلام محمد شامل ہیں۔ بھارت سے انسانی حقوق کے علمبردار سندیب پانڈے نے بھی ایک وفدکے ہمراہ اجلاس میں شرکت کی۔ انہوں نے شرکا ء کو یقین دلایاکہ وہ بھارت میں انسانی حقوق کی علمبردار تنظیموں سے مل کر کشمیریوںپر ڈھائے جانے والے مظالم کو بھارت کی سول سوسائٹی تک پہنچائیں گے ۔سندیپ پانڈے کی سربراہی میں آئے وفد میںپرشانت کمار پانڈے،رام کرشن دوبے، روپیش، اور چیتن کمار شامل تھے۔ بھارتی پارلیمنٹ کے سابق رکن عبدالرحمن شیخ نے جنہوں نے تقریب کی صدارت کی ، وفد کی بتایا کہ جموں وکشمیر اپنی تاریخ کے بد ترین دور سے گزر رہا ہے اور بھارتیہ جنتا پارٹی کی حکومت یہاںکے عوام کے سیاسی ، اقتصادی اور انسانی حقوق پر تابڑ توڑ حملے کر رہی ہے۔
