بنگلورو: قرض کی ادائیگی میں تاخیر پر2 بہنوں کو برہنہ کر کے زدوکوب کیاگیا
بنگلورو30 جون (کے ایم ایس)
بھارتی ریاست کرناٹک کے شہربنگلورو میں قرض ادائیگی میں تاخیر کی وجہ سے دو بہنوں کو برہنہ کر کے انہیں زدو کوب کرنے کے علاوہ ان سے زیادتی کی کوشش کی گئی ہے ۔
کشمیرمیڈیاسروس کے مطابق بنگلورو کے سرجا پور پولیس اسٹیشن کی حدود میں پیش آنے والے اس واقعے کی شکایت کے اندراج میں پولیس لیت و لعل سے کام لے رہی تھی ۔ تاہم واقعے کی ویڈیو سوشل میڈیا پر وائرل ہونے اور عوامی غم و غصے اور دبائو کے بعد پولیس نے مقدمہ درج کر کے اس واقعے میں ملوث ملزموں رام کرشن ریڈی اور سنیل کمار کو گرفتار کرلیا ہے۔یہ واقعہ انیکل تعلقہ کے علاقے ڈوڈبوماسندراکے گائوں نیریگا میں پیش آیاہے۔تفصیلات کے مطابق متاثرہ خواتین میں سے ایک نے اپنے بچوں کی تعلیم کے لیے رام کرشن ریڈی سے 30فیصد سود پر ایک لاکھ روپے قرض لیا تھا۔ رام کرشن ریڈی نے ان سے قرض کی پوری رقم یک مشت واپس کرنے کو کہا تھا۔ جس کے بعدگائوں والوں نے رام کرشن سے زمین فروخت ہونے تک قرض کی ادائیگی میں مہلت دینے کا معاہدہ کیا تھا۔تاہم معاہدے کے باوجود ملزمان نے خواتین کی رہائش گاہ میں زبردستی گھس کر انہیں برہنہ کرنے کے علاوہ ان سے زیادتی کی کوشش کی ۔
دریں اثنادونوں خواتین پر ملزمان کے تشدد اور انہیں برہنہ کرنے کی کوشش کی ویڈیوز سوشل میڈیا پر وائرل ہوگئی ہے ۔
