بھارت :چھتیس گڑھ میں نکسل گوریلوں کا تعمیراتی مقام پر دھاوا،مشینیں نذرآتش
رائے پور 20فروری(کے ایم ایس) بھارتی ریاست چھتیس گڑھ میں خواتین نکسل گوریلوں نے ایک تعمیراتی مقام پر دھاوا بول دیا اور سڑک کی تعمیر میں استعمال ہونے والی تین مشینوں کونذرآتش کردیا۔
کشمیر میڈیا سروس کے مطابق سیاسی انصاف اور آزاد وطن کا مطالبہ کرنے والی خواتین نکسل گوریلوں نے ریاست کے ضلع کانکیر میں سڑک کی تعمیر کے لئے استعمال ہونے والی سرکاری مشینوں کو نذر آتش کر دیا۔متعلقہ علاقے پکھنجورکے ایڈیشنل سپرنٹنڈنٹ آف پولیس دھیریندر پٹیل نے بتایا کہ یہ واقعہ ریاست کے دارالحکومت رائے پور سے تقریبا 200کلومیٹر دورپرتاپور پولیس اسٹیشن کے حدود میں کامٹیڈا اور گٹاکل گائوں کے درمیان پیش آیا۔انہوں نے کہاکہ خواتین نکسلیوں نے تعمیراتی مقام پر دھاوا بول دیا اور مزدوروں سے کہا کہ وہ ریاست میں بھارتی وزیر اعظم نریندر مودی کے” گرام سڑک منصوبے” کے تحت کام بند کر دیں۔ادھر بھارتی فوجیوں اور پولیس اہلکاروں نے علاقے میں تلاشی کی کارروائی شروع کر دی ہے۔
