مقبوضہ جموں وکشمیر:پونچھ میں گاڑی کے کھائی میں گرنے سے متعدد طلبا ء زخمی
جموں19مارچ(کے ایم ایس) غیر قانونی طور پر بھارت کے زیر قبضہ جموں و کشمیر میںضلع پونچھ میں ایک گاڑی سڑک سے پھسل کر ایک کھائی میں گرنے سے چھ لڑکیوں سمیت 13 طلباء زخمی ہو گئے ہیں۔
کشمیرمیڈیاسروس کے مطابق پولیس حکام نے بتایا کہ یہ حادثہ ضلع کے علاقے مینڈھر میں کیری کانگڑا کے قریب اس وقت پیش آیا جب ڈرائیور گاڑی کاکنٹرول کھو بیٹھا اور گاڑی کئی فٹ نیچے کھائی میں جاگری ۔زخمیوں کو مقامی لوگوں اور پولیس نے فوری طور پر مقامی ہسپتال پہنچایا۔ بی ایم او مینڈھر ڈاکٹر پی اے خان نے تصدیق کی کہ13طالبعلموں کو سب ڈسٹرکٹ اسپتال میں داخل کیا گیا ہے۔ انہوں نے بتایا کہ ان میں سے دو کو مزید علاج کے لیے جی ایم سی راجوری منتقل کیا گیا ہے۔ایک پولیس افسر نے صحافیوں کو بتایاکہ کیس درج کر لیا گیا ہے اور مزید تحقیقات شروع کر دی گئی ہیں۔
دریں اثناء مقامی لوگوں نے ٹریفک پولیس پر الزام عائد کیا کہ وہ گاڑیوں میں اوورلوڈنگ کو روکنے میں ناکام رہی ہے جس کی وجہ سے علاقے میں حادثات پیش آ رہے ہیں۔ انہوں نے اعلیٰ حکام پر زور دیا کہ وہ معاملے کا جائزہ لیں اور اس بات کو یقینی بنائیں کہ گاڑیوں میں زیادہ بھیڑ نہ ہو تاکہ حادثات سے بچا جا سکے۔
