راجستھان :ٹریلر اور بس میں تصادم سے 6خواتین سمیت11افراد ہلاک
نئی دلی:
بھارتی ریاست راجستھان میں ٹریلر ایک کھڑی بس سے ٹکرانے کے نتیجے میں 11 افراد ہلاک اور 12 زخمی ہوگئے ہیں۔
ضلع بھرت پور ٹریفک پولیس کے ترجمان نے میڈیا کو بتایا ہے کہ جئے پورآگرا شاہراہ پر ریاست گجرات سے مسافروں کو مذہبی رسوم کی ادائیگی کے لیے اتر پردیش لے جانے والی بس فلائی اوور پر ایندھن ختم ہونے کی وجہ سے رکی ہوئی تھی، اس دوران پیچھے سے آنے والاایک ٹریلربس ٹکرا گیا۔پولیس کے مطابق حادثے میں 5 مرد اور 6 خواتین کی موقع پر ہی موت ہوگئی جبکہ 12زخمی ہوگئے۔حادثے کے وقت بعض مسافر بس میں موجود تھے جبکہ کچھ باہر کھڑے ہوئے تھے۔انہوں نے بتایا کہ ہلاک اور زخمی ہونے والوں کو قریبی ہسپتالوں میں منتقل کردیا گیا ہے۔بھارتی میڈیا کے مطابق پولیس نے حادثے کا مقدمہ درج کر کے تحقیقات شروع کردی ہیں۔
واضح رہے کہ بھارت میں ہر سال تقریبا ڈیڑھ لاکھ افراد سڑک حادثات میں ہلاک ہو جاتے ہیں۔
