مقبوضہ جموں و کشمیر
لبریشن فرنٹ کی طرف سے فلسطین کے خلا ف اسرائیلی جارحیت کی مذمت
سرینگر:غیرقانونی طورپر بھارت کے زیر قبضہ جموں وکشمیر میں جموں و کشمیر لبریشن فرنٹ نے فلسطینیوں پر اسرائیلی جارحیت کی شدیدمذمت کرتے ہوئے اقوام متحدہ اور اسلامی تعاون تنظیم سے فلسطین پر اسرائیلی حملے بند کرانے کیلئے فوری مداخلت کی اپیل کی ہے ۔
کشمیرمیڈیاسروس کے مطابق لبریشن فرنٹ نے سرینگر میں جاری ایک بیان میں کہا کہ فلسطینی عوام گزشتہ کئی دہائیوں سے قبلہ اول، مسجد اقصیٰ اور فلسطینی سرزمین کو اسرائیل کے ناجائز قبضے سے آزاد کرانے کے لیے جدوجہد کررہے ہیں اور انہیںاسرائیلی جارحیت کا سامنا ہیں۔ بیان میں کہاگیا کہ بھارتی وزیراعظم نریندر مودی بھی صہیونی اسرائیل کی طرز پر مقبوضہ جموں و کشمیر کی آبادی کا تناسب تبدیل کرنے کے لیے ظالمانہ اقدامات کر رہے ہیں۔ لبریشن فرنٹ نے فلسطینی مسلمانوں کے ساتھ مکمل یکجہتی کا اظہار بھی کیا۔
