جموں وکشمیر کے حوالے سے جو دعوے کئے جارہے ہیں وہ حقیقت سے کوسوں دور ہیں:فاروق عبداللہ
جموں:غیر قانونی طور پر بھارت کے زیر قبضہ جموں و کشمیر میں نیشنل کانفرنس کے سربراہ ڈاکٹر فاروق عبداللہ نے کہاہے کہ جموں وکشمیر کے حالات میں کوئی تبدیلی نہیں آئی ہے۔
کشمیرمیڈیاسروس کے مطابق فاروق عبداللہ نے جموں میں صحافیوں سے گفتگو کرتے ہوئے کہاکہ عسکریت پسندوں کی کارروائیاں بدستور جاری ہیں۔انہوں نے کہا کہ پونچھ کے علاقے بفلیاز میں پانچ فوجی اہلکاروں کی ہلاکت اس بات کا ثبوت ہے کہ جموں وکشمیر میں حالات تبدیل نہیں ہوئے ہیں۔انہوں نے کہاکہ عسکریت پسندبھارتی فورسز کومسلسل نشانہ بنا رہے ہیں اور حکومت سب کچھ ٹھیک ہونے کا دعویٰ کررہی ہے۔انہوں نے کہاکہ جو لوگ کہتے ہیں کہ عسکریت پسندختم ہو گئے ہیں وہ یہ سب دیکھیں کہ یہا ں پر کیا ہو رہا ہے، انہیں فیصلہ کرنا ہے کہ بات چیت شروع کرنی ہے یا نہیں۔فاروق عبداللہ نے کہا کہ جموں وکشمیر کے حوالے سے جو دعوے کئے جارہے ہیں وہ حقیقت سے کوسوں دور ہیں۔
