ٹیکساس:مقبول بٹ شہید کی برسی کے موقع پر وحدت کشمیر کانفرنس کاانعقاد
ٹیکساس:امریکی ریاست ٹیکساس کے دارالحکومت آسٹن میں ممتاز کشمیری آزادی پسند رہنما شہید محمد مقبول بٹ کو ان کی برسی کے موقع پر شاندار خراج عقیدت پیش کرنے کیلئے وحدت کشمیر کانفرنس منعقد کی گئی ۔
کشمیرمیڈیاسروس کے مطابق جے کے این اے کے زیر اہتمام کانفرنس سے فلسطینی رہنما حسن علی اور انسانی حقوق کے نمائندہ رائے ظفر اقبال ایڈووکیٹ کے علاوہ مختلف مکاتب فکر کے سیاسی اور سماجی رہنمائوں نے خطاب کیا۔ کانفرنس میں پیش کی گئی قرارداد میں نئی دلی کی تہاڑ جیل میں دفن مقبول بٹ شہید اور افضل گورو شہید کی میتوں کو انکے اہلخانہ کے حوالے کرنے کا مطالبہ کیاگیا ۔قرارداد میں کہا گیا کہ مقبوضہ جموں وکشمیر سے بھارت کی قابض افواج کا انخلا کیا جائے۔قرارداد میں تہاڑ جیل میں قید کل جماعتی حریت کانفرنس کے رہنماء محمد یاسین ملک سمیت تمام سیاسی نظربندوں کی رہائی کا مطالبہ بھی کیاگیا ہے۔ قرارداد میں عالمی برادری سے فلسطین میں معصوم انسانوں کا قتل عام بند کروانے کیلئے کردار ادا کرنے پر زوردیاگیا ہے۔کانفرنس میں کشمیری آزادی پسند قائدین نے خطاب کیا ،جبکہ مرد اورخواتین کی بڑی تعداد نے شرکت کی ۔
