بھارت :گجرات میں ہندو انتہاپسندوں نے مسلمان نوجوان کو پیٹ پیٹ کر قتل کردیا

نئی دہلی: بھارتی ریاست گجرات میں ہندو انتہاپسندوں نے ایک23سالہ مسلمان نوجوان سلمان ووہرا کو پیٹ پیٹ کر قتل کردیا۔
کشمیرمیڈیاسروس کے مطابق سلمان ووہرا گجرات کے علاقے چکھوڈرا میں کرکٹ ٹورنامنٹ کا میچ دیکھنے گیاتھا اور گاڑی پارکنگ کے مسئلے پرہونے والے جھگڑے کے بعد ہندو انتہاپسندوں کے ایک گروپ نے انہیں بے رحمی سے پیٹ پیٹ کرقتل کر دیا۔سلمان کی دو ماہ قبل شادی ہوئی تھی اور ان کی بیوی ایک ماہ کی حاملہ ہے۔ وہ گجرات کے علاقے آنند میں پولسن کمپائونڈ کے رہنے والے تھے اور کپڑے کا کاروبار کرتے تھے۔بھارتی ذرائع ابلاغ کے مطابق ہندو انتہا پسند سلمان کو ”جے شری رام” جیسے ہندوتوا نعرے لگاتے ہوئے ماررہے تھے کیونکہ مسلمان کھلاڑیوں نے ٹورنامنٹ میں اچھی کارکردگی کا مظاہرہ کیا تھا۔مقامی لوگوں نے میڈیا کو بتایا کہ میچ سے پہلے ہی کشیدگی شروع ہو گئی تھی کیونکہ مسلمان کھلاڑی ٹورنامنٹ میں شاندار کارکردگی کا مظاہرہ کر رہے تھے جو ہند انتہاپسندتنظیموں سے وابستہ لوگوں کو اچھا نہیں لگ رہا تھا۔ایک سماجی کارکن عاصم کھیڈوالا نے بتایا کہ کوارٹر فائنل اور سیمی فائنل میں شاندار کارکردگی دکھانے والے بہت سے کھلاڑی مسلمان تھے۔بظاہر فائنل میں بھی ایک ٹیم زیادہ تر مسلمانوں پر مشتمل تھی اور دوسری ٹیم میں 2سے3 کھلاڑی مسلمان تھے۔جب مسلمان کھلاڑی کھیل رہے تھے تو ہندو انتہا پسند جے شری رام کے نعرے لگانے لگے۔ سلمان کی موت کا واقعہ پارکنگ کے تنازعے سے شروع ہوا۔ ایک گروپ موٹرسائیکلوں پر آیا اور سلمان کے ساتھ جھگڑا کیا اور اسے کہا کہ وہ اپنی موٹر سائیکل کو اسٹینڈ سے ہٹا دے۔ اس مسلے پر سلمان کی شرپسندوں سے لڑائی شروع ہوئی۔انہوں نے سلمان کو بے رحمی سے مارنا شروع کر دیا۔ سلمان حملے میں شدید زخمی ہوگیا اورانہیں قریبی اسپتال لے جایا گیا لیکن وہاں پہنچنے پر انہیں کسی بڑے پرائیویٹ اسپتال جانے کو کہا گیا۔تاہم دوسرے اسپتال پہنچنے سے پہلے ہی سلمان نے دم توڑدیا۔ رپورٹ میں کہا گیا ہے کہ حملے میں دیگر کئی مسلمان زخمی بھی ہوئے۔ سلمان کے اہلخانہ نے آنند رورل پولیس اسٹیشن میں ایف آئی آر درج کرائی۔ ابھی تک 7ملزمان کو گرفتار کیا گیا ہے جن کی شناخت چکھوڈرا سے تعلق رکھنے والے میہول عرف گیٹو دنیش بھائی پرمار، کرن عرف ہولو مفت بھائی پرمار، مہندر عرف فلیو رمیش بھائی واگھیلا، اکشے عرف اکو نرسنگ بھائی پرمار، رتی لال رائسنگ بھائی پرمار، وجے عرف پکورانی منگل بھائی پرماراور وگھاسی کے کیتن مہندر بھائی پٹیل کے طورپر کی گئی ہے۔