سرینگر: انتظامیہ نے عمر عبداللہ ، محبوبہ مفتی کو مزار شہداءنقشبند صاحب جانے سے روک دیا
سری نگر:بھارت کے غیر قانونی زیر قبضہ جموں و کشمیر میں انتظامیہ نے نیشنل کانفرنس کے نائب صدر عمر عبداللہ اور پیپلز ڈیموکریٹک پارٹی کی صدر محبوبہ مفتی کو”یوم شہدائے کشمیر “ پر آج سرینگر میں مزار شہداءنقشبند صاحب جانے سے روک دیا۔
کشمیر میڈیا سروس کے مطابق نیشنل کانفرنس کے نائب صدر عمر عبداللہ نے سماجی رابطوں کے پلیٹ فارم ”ایکس “ پر لکھا ”13جولائی یوم شہداء، ان لوگوں کو خراج عقیدت پیش کرنے سے روکنے کیلئے ظلم وجبر کا ایک اور دور جنہوں نے جموں و کشمیر میں ایک منصفانہ،صاف و شفاف اور جمہوری حکومت کے قیام کے لیے اپنی جانیں قربان کی ہیں، کشمیر میں انتظامیہ ان قربانیوں کو نظر انداز کرنا چاہتی ہے۔“
، محبوبہ مفتی نے بھی ”ایکس “ پر لکھا ”مجھے مزارِ شہداءجانے سے روکنے کے لیے میرے گھر کے دروازے ایک بار پھر بند کر دیے گئے ہیں ، یہ شہداءآمریت، جبر اور ناانصافی کے خلاف کشمیریوں کی مزاحمت کی ایک لازوال علامت ہیں، ہمارے شہداکی قربانیاں اس بات کا ثبوت ہیں کہ کشمیریوں کے جذبے کو کچلا نہیں جا سکتا۔“
