بھارت مقبوضہ کشمیر کے بچوں سے بھی خوفزدہ ہے،رضیہ سلطانہ
کشمیری بہادر بچے بھارتی تسلط سے آزادی تک جدوجہد جاری رکھیں گے
اسلام آباد:
کشمیری حریت رہنما یاسین ملک کی صاحبزادی رضیہ سلطانہ نے کہا ہے کہ بھارت مقبوضہ کشمیر کے بچوں سے بھی خوفزدہ ہے اور وہ انکے خلاف بھی طاقت کا استعمال کر رہا ہے لیکن وہ یاد رکھے کہ کشمیری بہادر بچے کشمیر کی آزادی تک اپنی جدوجہد جاری رکھیں گے اور کشمیر ضرور آزاد ہو گا۔
کشمیرمیڈیاسروس کے مطابق یوم استحصال کے موقع پر ریڈیو پاکستان کو خصوصی انٹرویو میں رضیہ سلطانہ نے کہا کہ کشمیریوں نے اپنی زندگی آزادی کیلئے وقف کر رکھی ہیں۔انہوںنے کہاکہ انکے والد نے اپنی ساری زندگی کشمیر کی آزادی کیلئے وقف کی ہے، اسی وجہ سے بھارت نے انہیں پابند سلاسل کررکھا ہے۔ تاہم انہوں نے ہم کبھی بھی اپنے مقصد سے پیچھے نہیں ہٹیں گے۔ایک سوال کے جواب میں انہوں نے کہا کہ ہم آزادی تک اپنی جدوجہد جاری رکھیں گے، ہم کبھی بھی آزادی پر کوئی سمجھوتہ نہیں کریں گے، میں یاسین ملک اور کشمیر کی بیٹی ہوں، ہم کبھی بھی اس جدوجہد سے پیچھے نہیں ہٹیں گے۔ انہوں نے کہا کہ ان کی والد سے کئی سال سے فون پر بھی بات نہیں ہوئی۔ انہوں نے کہا کہ ہندوستان کے بچوں سے اپیل ہے کہ وہ اپنے آبائو اجداد کے کشمیریوں کو استصواب رائے دینے کے وعدے پر عمل نہ کرنے کے حوالہ سے ان کے سامنے سوال اٹھائیں، یہ ہمارا حق ہے، بھارتی وزیراعظم نریندرمودی کشمیری بچوں سے بھی خوفزدہ ہے، وہ ان کے خلاف پیلٹ گنز کا استعمال کرتا ہے، ان کے سکول جلاتا ہے لیکن کشمیری بچے بہادر ہیں، وہ کبھی بھی ان کے سامنے نہیں جھکیں گے۔رضیہ سلطانہ نے مودی کو پیغام دیا کہ جو ڈرامہ اس نے رچایا ہوا ہے اس میں وہ ناکام ہو گا، مودی بزدل ہے جو بچوں پر ظلم کرتا ہے۔ انہوں نے اقوام متحدہ سے سوال کیا کہ کشمیر کے بچے کیوں اپنے والدین، گھروں اور سکولوں سے محروم کئے جا رہے ہیں، اقوام متحدہ کشمیریوں کے حق خود ارادیت کیلئے ان کی مدد کرے۔ انہوں نے کہا کہ پاکستان نے ہمیشہ کشمیر کے مسئلہ پر ہماری مدد کی ہے اور ہمیشہ کشمیر کیلئے آواز اٹھائی ہے، کشمیریوں کو جلد آزادی ملے گی۔
