روح اللہ مہدی کی طرف سے مقبوضہ کشمیر کی خصوصی حیثیت کی بحالی کے موقف کا اعادہ
سرینگر: غیر قانونی طور پر بھارت کے زیر قبضہ جموں و کشمیر میں نیشنل کانفرنس کے رہنما اوربھارتی پارلیمنٹ کے رکن آغا روح اللہ مہدی نے دفعہ370کے تحت جموں و کشمیر کی خصوصی حیثیت کی بحالی کے اپنے غیر متزلزل موقف کا اعادہ کیا ہے۔
کشمیر میڈیا سروس کے مطابق آغا روح اللہ مہدی نے ایکس پرایک پوسٹ میں کہا کہ وہجموں و کشمیر کی ریاستی حیثیت کی بحالی کیلئے بھارتی دارلحکومت نئی دلی میں احتجاج میں شرکت کے لیے تیار ہیں۔ انہوں نے کہاکہ وہ اس سلسلے میں100سے زائد بھارتی اراکین پارلیمنٹ کی حمایت حاصل کرنے کی بھی کوشش کر رہے ہیں ۔انہوں نے دفعہ 370کی منسوخی کے مودی حکومت کے غیر قانونی اقدام کی کڑی تنقید کرتے ہوئے کہاکہ مقبوضہ علاقے کی خصوصی حیثیت کی بحالی کے بغیر ریاست کا درجہ قبول کرنا ایک ایسا سمجھوتہ ہوگا جس کی وہ توثیق نہیں کرسکتے۔روح اللہ مہدی نے کہا کہ 2019کے بعد ان کا سیاسی موقف بالکل واضح ہے۔ انہوں نے کہا کہ ہماری لڑائی دفعہ 370کی بحالی اورکشمیریوں کے وقار کے لیے ہونی چاہیے۔
