بھارتی اداکار سیف علی خان ڈکیتی کے دوران مزاحمت پر شدید زخمی
ممبئی: معروف بھارتی اداکار سیف علی خان گھر میں ڈکیتی کے دوران مزاحمت پر شدید زخمی ہو گئے ہیں۔
کشمیر میڈیاسروس کے مطابق یہ واقعہ رات 2 بج کر 30 منٹ پر ممبئی میں اداکار کے گھر میں پیش آیا۔بھارتی میڈیا رپورٹس کے مطابق مزاحمت پر سیف علی خان زخمی ہوگئے جنہیں لیلاوتی اسپتال منتقل کردیا گیا ہے۔ رپورٹس میں کہا گیا کہ نامعلوم شخص نے چوری کی نیت سے سیف علی خان کے گھر میں داخل ہونے کی کوشش کی جس پر سیف علی خان نے مزاحمت کی تو ملزم فرار ہوگیا۔
رپورٹس میں بتایا جارہا ہے کہ اداکار پر چاقو سے حملہ کیا گیا جس سے وہ زخمی ہوگئے، جب کہ باقی گھر والے محفوظ رہے۔
اداکار کی لیلاوتی اسپتال میں سرجری کردی گئی ہے، ہسپتال کے سی او او ڈاکٹر نیرج تمانی کے بیان کے مطابق سیف کو چاقو کے وار سے چھ زخم آئے جس میں سے دو کافی گہرے تھے۔ڈاکٹر کے مطابق ان میں سے ایک زخم ریڑھ کی ہڈی کے نزدیک تھا۔
پولیس کا بتانا ہے کہ واقعہ کی تفتیش جاری ہے جب کہ گھر والوں کے بیانات بھی ریکارڈ کیے جارہے ہیں اور پولیس گھر میں لگے سی سی ٹی وی کیمروں سے ملزم کی شناخت کی کوشش کررہی ہے۔ سیف علی خان اپنی اہلیہ کرینہ کپور اور دو بچوں کےساتھ باندرا کے گھرمیں رہائش پذیر ہیں۔
