بھارت نے ننکانہ صاحب میں سکھوں کی عبادت گاہ کو بھی ڈرون حملوں کا نشانہ بنانے کی کوشش کی،پاک فوج
راولپنڈی:ڈی جی آئی ایس پی آر لیفٹیننٹ جنرل احمد شریف چوہدری نے کہا کہ بھارت نے ننکانہ صاحب میں سکھوں کی عبادت گاہ کو بھی نشانہ بنانے کی کوشش کی، اس نے عبادت گاہ کی طرف 6 ڈرون بھیجے جنہیں ناکارہ بنا یا گیا۔
کشمیر میڈیاسروس کے مطابق ترجمان پاک فوج بین الاقوامی میڈیا کو پریس بریفنگ میںکہا کہ بھارت کے پاکستان پر حملے کے وقت 57 مسافر طیارے فضا میں تھے، بھارت نے ائیرلائنز کے مسافروں کی زندگیوں کو خطرے میں ڈالا، بھارتی حملوں میں 2 سال کی ایک بچی بھی نشانہ بنی اور بھارتی میڈیا اس پر جشن منارہا ہے،ہم جوابی کارروائی میں صرف بھارتی فوج کی پوسٹوں کو نشانہ بنارہے ہیں، ہم بھارتی فوج کے ان پوسٹوں کو نشانہ بناتے ہیں جہاں سے پاکستان پر فائرنگ ہو۔
ڈی جی آئی ایس پی آر کا کہنا تھا کہ بھارت میں مسلمانوں اور دیگر اقلیتوں پر حملے کیے جا رہے ہیں، بھارت میں کھلے عام مسلمانوں کو قتل کرنے کی دھمکیاں دی جارہی ہیں۔ان کاکہنا تھا کہ بھارت پاکستان میں فتنہ الخوارج اور دیگر دہشت گردوں کو معاونت فراہم کر رہا ہے، بھارت نے غیرجانبدار سوشل میڈیا اکاو¿نٹس بندکردیے، بھارت کچھ سال بعد ایک جھوٹی کہانی بنا کر بیانیہ بنانا شروع کردیتا ہے، مقبوضہ کشمیر میں جعلی انکاونٹرز بھارتی قابض فوج کا معمول ہے۔ انہوں نے کہا کہ بھارت پاکستان کے علاوہ امریکا ،کینیڈا اور دیگرممالک میں دہشت گردی میں کر رہا ہے، بھارت پاکستان میں دہشت گردی کا اسپانسر ہے جس کے ثبوت موجود ہیں۔KMS
