فاروق رحمانی کا پاکستان بھر میں سیلاب سے ہونے والے جان ومال کے نقصان پر اظہار افسوس
اسلام آباد:کل جماعتی حریت کانفرنس کی آزاد جموں و کشمیر شاخ کے سینئر رہنمااورجموں و کشمیر پیپلز فریڈم لیگ کے چیئرمین محمد فاروق رحمانی نے خیبر پختونخوااورگلگت بلتستان سمیت پاکستان بھر میں سیلاب اور موسلادھار بارشوں سے سینکڑوں شہریوں کے جاں بحق ہونے اوردیگراملاک کے تباہ ہونے پر گہرے دکھ اورافسوس کا اظہار کیا ہے۔
کشمیر میڈیا سروس کے مطابق محمد فاروق رحمانی نے اسلام آباد میں ایک بیان میں کہا کہ پاکستان کو گلوبل وارمنگ اور گلیشیئرز پگھلنے کی وجہ سے آزمائشوں اورمشکلات کا سامنا ہے۔انہوں نے حکومت اور امدادی تنظیموں سے اپیل کی کہ وہ سیلاب کے متاثرین کو مکمل مدد فراہم کرنے کے لئے ایک جامع منصوبے پر عمل درآمد کریں۔انہوں نے امید ظاہر کی کہ حکومت اور اقوام متحدہ کے ادارے ملک میں گلوبل وارمنگ سے متعلق اقوام متحدہ کے منصوبے پر کام کرنے کے لیے مل کر کام کریں گے۔
