عالمی سطح پر بھارتی "گودی میڈیا” کا جھوٹ اور پروپیگنڈا بے نقاب ، الجزیرہ کی چشم کشا رپورٹ
بھارتی میڈیا پر اعتبار کا بحران سب سے زیادہ خود بھارت کے اندر محسوس کیا جا رہا ہے
دوحہ: معروف عالمی میڈیا نیٹ ور ک الجزیرہ نے بھارتی گودی میڈیا کے منظم جھوٹ، سنسنی خیزی اور نفرت انگیز پروپیگنڈے کو عالمی سطح پر بے نقاب کر دیاہے۔
کشمیرمیڈیاسروس کے مطابق الجزیرہ رپورٹ میں انکشاف کیا گیا کہ بھارت میں ریاستی سرپرستی کے تحت میڈیا کو ہندوتوا نظریہ کے فروغ اور ہمسایہ ممالک کے خلاف نفرت انگیز بیانیہ پھیلانے کے لیے استعمال کیا جا رہا ہے۔ بھارت کے گودی میڈیا کو عوام کی طرف سے اعتبار کے بحران کاسامنا ہے۔کیونکہ بھارتی میڈیا ادارے بتدریج سیاسی اور کارپوریٹ اتحادیوں کے قبضے میں جا رہے ہیں۔بھارتی صحافی مینا کشی راوی نے کہا ہے کہ بھارت میں میڈیا اب آزاد صحافت کا ذریعہ نہیں بلکہ پروپیگنڈا ٹول بن چکا ہے، جو ہمسایہ ممالک کے خلاف نفرت اور ہندوتوا سیاست کو بڑھاوا دیتا ہے۔صحافی سمیتہ شرما نے بھی بھارتی ٹی وی چینلز پر سخت تنقید کرتے ہوئے کہا کہ بھارت میں ٹی وی صحافت اعتبار کے شدید بحران کا شکار ہے، جہاں زیادہ شور اور کم معلومات پیش کی جاتی ہیں۔انہوں نے انکشاف کیا کہ بھارتی چینلز نے ماضی میں پاکستان کے لاہور اور کراچی پر قبضے کے جعلی دعوے بھی نشر کیے۔ہمال سائوتھ ایشین کے ایڈیٹر رومن گوتھم کے مطابق،بھارتی میڈیا کا مقصد عوام کو حقیقت بتانا نہیں بلکہ سرکاری بیانیے کوفروغ دینا ہے۔الجزیرہ نے اپنی رپورٹ میں مزید کہا کہ بھارت میں تنقیدی صحافیوں کو پولیس کی کارروائیوں، مقدمات اور ملازمتوں سے محرومی کے ذریعے خاموش کرایا جا رہا ہے، جس کے باعث عالمی پریس فریڈم انڈیکس میں بھارت کی درجہ بندی مسلسل گرتی جا رہی ہے۔رپورٹ کے مطابق، بھارت کا گودی میڈیا جو ریاستی سرپرستی میں جھوٹ، پروپیگنڈا اور ہندوتوا نظریہ کو پھیلا رہا ہے اب دنیا بھر میں بے نقاب ہو چکا ہے۔
