مضامین

یومِ شہدائے جموں: ناقابلِ فراموش قربانیوں کی داستان اور آزادی کے لیے کشمیریوں کا غیر متزلزل عزم

ارشد میر

6 نومبر 1947ء تاریخِ کشمیر کا وہ المناک اور خون آشام دن ہے جس نے جموں کی سرزمین کو بے گناہ انسانوں کے خون سے رنگین کر دیا۔ یہ ایک قتلِ عام کی یاد ہی نہیں بلکہ ایک پوری قوم کے اجتماعی حافظے میں ثبت وہ دردناک باب ہے جو آج بھی کشمیریوں کو اپنے شہداء کے ادھورے مشن کی تکمیل اور حقِ خودارادیت کے حصول کا عزم تازہ کرنے کی تحریک دیتا ہے۔ ہر سال یومِ شہدائے جموں کے موقع پر مقبوضہ اور آزاد جموں و کشمیر، پاکستان اور دنیا بھر میں آباد کشمیری اپنے ان لاکھوں بزرگوں، ماؤں، بہنوں، بچوں اور نوجوانوں کو خراجِ عقیدت پیش کرتے ہیں جنہوں نے 1947ء میں پاکستان کی طرف ہجرت کے دوران ڈوگرہ مہاراجہ ہری سنگھ کی افواج، بھارتی فوج اور آر ایس ایس کے انتہا پسند مسلح جتھوں کے ہاتھوں اپنی جانیں قربان کیں۔ ان شہداء کا خون آج بھی تحریکِ آزادی کشمیر کی تاریخ کا ایک ناقابلِ فراموش حوالہ اور آنے والی نسلوں کے لیے عزم و استقامت کا سرچشمہ ہے۔

نومبر 1947ء کے ابتدائی ایام میں جموں کے مختلف علاقوں میں مسلمانوں کے خلاف جس منظم قتلِ عام کا ارتکاب کیا گیا، اس کا مقصد صرف بے گناہ انسانوں کا خون بہانا نہیں تھا بلکہ جموں کی مسلم اکثریتی شناخت کو مٹانا اور علاقے کی آبادی کا تناسب تبدیل کرنا بھی تھا۔ پاکستان کی طرف ہجرت کرنے والے مسلمان قافلوں کو نشانہ بنایا گیا، ان کے راستے خون سے رنگ دیے گئے اور ہزاروں خاندانوں کو اجاڑ دیا گیا۔ لاکھوں انسانوں کی قربانیوں سے عبارت اس سانحے نے کشمیری تاریخ پر گہرے زخم ثبت کیے۔ اپنے گھروں، زمینوں اور آبائی علاقوں سے بے دخل ہونے والے خاندانوں نے جس کرب اور مصیبت کا سامنا کیا، وہ آج بھی ان کی نسلوں کے اجتماعی شعور کا حصہ ہے۔ یہ قتلِ عام اس حقیقت کی بھی یاد دہانی ہے کہ کشمیریوں کی آزادی اور پاکستان کے ساتھ وابستگی کا سوال محض سیاسی نعرہ نہیں بلکہ تاریخ، شناخت اور بے شمار انسانی قربانیوں سے جڑا ہوا معاملہ ہے۔

یومِ شہدائے جموں کی اہمیت اس لیے بھی غیر معمولی ہے کہ یہ دن کشمیریوں کو اپنی تاریخ کے ان حقائق سے وابستہ رکھتا ہے جنہیں بھارتی حکمران طبقہ اور اس کا انتہا پسند نظریاتی ڈھانچہ مسلسل نظرانداز کرنے یا مسخ کرنے کی کوشش کرتا رہا ہے۔ بھارت آج مقبوضہ جموں و کشمیر میں امن، ترقی اور معمولاتِ زندگی کی بحالی کے بلند بانگ دعوے کرتا ہےلیکن اس کے ریاستی اقدامات، فوجی تسلط، سیاسی پابندیوں اور کشمیریوں کی مسلسل گرفتاریوں نے ان دعوؤں کی حقیقت بے نقاب کر دی ہے۔ 1947ء میں جس ڈوگرہ اور انتہا پسند ذہنیت نے مسلمانوں کو ان کی سرزمین سے بے دخل کرنے اور ان کی اجتماعی شناخت کو ختم کرنے کی کوشش کی تھی، کشمیریوں کے نزدیک آج بھی اسی ذہنیت کی بازگشت بھارتیہ جنتا پارٹی اور آر ایس ایس کے نظریاتی منصوبے میں سنائی دیتی ہے۔ 5 اگست 2019ء کے یکطرفہ اقدامات اور اس کے بعد مقبوضہ علاقے کی سیاسی و آئینی حیثیت میں تبدیلی کی کوششیں اسی تسلط پسندانہ سوچ کا تسلسل ہیں۔

شہدائے جموں کا پیغام یہ ہے کہ ظلم و جبر کے سامنے سر جھکانے کے بجائے اپنے بنیادی حقوق اور قومی تشخص کے تحفظ کے لیے ثابت قدم رہا جائے۔ ان شہداء نے اپنے خون سے جس عہد کی بنیاد رکھی، وہ آج بھی کشمیری عوام کے دلوں میں زندہ ہے۔ یہی وجہ ہے کہ کنٹرول لائن کے دونوں جانب اور دنیا کے مختلف ممالک میں آباد کشمیری 6 نومبر کو یومِ شہدائے جموں منانے کی تیاریاں کر رہے ہیں۔ آزاد جموں و کشمیر کے تمام دس اضلاع کے چھوٹے بڑے شہروں اور پاکستان کے مختلف علاقوں میں بھارت مخالف مظاہرے، سیمینارز اور مذاکرے منعقد کیے جائیں گے۔ مساجد میں نمازِ فجر کے بعد خصوصی دعاؤں، شہداء کے ایصالِ ثواب کے لیے قرآن خوانی اور مختلف سیاسی، سماجی، مذہبی اور عوامی تنظیموں کے زیرِ اہتمام تعزیتی اجتماعات کا انعقاد اس عزم کی تجدید کرے گا کہ شہداء کی قربانیاں رائیگاں نہیں جانے دی جائیں گی۔ ان تقریبات کا مقصد صرف ماضی کے سانحے کو یاد کرنا نہیں بلکہ عالمی ضمیر کو جھنجھوڑنا اور مسئلہ کشمیر کو اس کے حقیقی تاریخی اور سیاسی تناظر میں اجاگر کرنا بھی ہے۔

کل جماعتی حریت کانفرنس کے رہنماؤں کی جانب سے شہدائے جموں کو خراجِ عقیدت پیش کرنا بھی اس حقیقت کو نمایاں کرتا ہے کہ مقبوضہ کشمیر کی آزادی پسند قیادت اور عوام اپنے شہداء کے مشن سے آج بھی وابستہ ہیں۔ ان کا یہ عزم کہ آزادی کی جدوجہد اپنے منطقی انجام تک پہنچائی جائے گی، اس امر کا اظہار ہے کہ بھارتی جبر اور ریاستی طاقت کشمیریوں کی سیاسی امنگوں کو ختم نہیں کر سکے۔ دہائیوں سے جاری جدوجہد میں کشمیریوں نے بے شمار قربانیاں دی ہیں لیکن ان کے بنیادی مطالبے میں کوئی تبدیلی نہیں آئی۔ وہ اقوام متحدہ کی سلامتی کونسل کی متعلقہ قراردادوں کے مطابق آزادانہ اور غیر جانبدارانہ استصوابِ رائے کے ذریعے اپنے مستقبل کا فیصلہ کرنے کا حق چاہتے ہیں۔ یہ ان کا ناقابلِ تنسیخ حق ہے جسے کسی یکطرفہ آئینی اقدام، فوجی قبضے یا طاقت کے استعمال سے ختم نہیں کیا جا سکتا۔

عالمی برادری کی ذمہ داری ہے کہ وہ یومِ شہدائے جموں کے تاریخی پیغام کو محض ایک یادگاری تقریب تک محدود نہ رکھے بلکہ مقبوضہ کشمیر میں جاری بھارتی مظالم کے خاتمے اور تنازع کشمیر کے منصفانہ حل کے لیے عملی کردار ادا کرے۔ بھارت کو انسانی حقوق کی خلاف ورزیوں اور کشمیری عوام کے بنیادی سیاسی حقوق سلب کرنے پر جواب دہ بنانا ناگزیر ہے۔ اقوام متحدہ کو اپنی قراردادوں پر عمل درآمد یقینی بنانے کے لیے مؤثر اقدامات کرنے چاہئیں تاکہ کشمیریوں کو اپنے مستقبل کا فیصلہ کرنے کا موقع مل سکے۔

یومِ شہدائے جموں دراصل ایک عہد، ایک نظریے اور ایک مسلسل جدوجہد کا نام ہے۔ یہ دن یاد دلاتا ہے کہ قوموں کی آزادی کی تحریکیں قربانیوں، استقامت اور اجتماعی عزم سے زندہ رہتی ہیں۔ جموں کے شہداء نے اپنے لہو سے تاریخ میں جو داستان رقم کی، اسے نہ وقت مٹا سکتا ہے اور نہ جبر کی کوئی طاقت فراموش کرا سکتی ہے۔ کشمیری عوام آج بھی اپنے شہداء کے مشن کی تکمیل کے لیے پرعزم ہیں۔ ان کی منزل حقِ خودارادیت، آزادی اور اپنے سیاسی مستقبل کا آزادانہ فیصلہ ہے۔ 6 نومبر کا ہر سال لوٹ کر آنا اس عہد کی تجدید ہے کہ شہداء کا لہو رائیگاں نہیں جائے گا اور جدوجہدِ آزادی اس وقت تک جاری رہے گی جب تک کشمیری قوم اپنے ناقابلِ تنسیخ حق سے بہرہ مند نہیں ہو جاتی۔

Channel | Group  | KMS on
Subscribe Telegram Join us on Telegram| Group Join us on Telegram
| Apple 

متعلقہ مواد

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button