کشمیری کل بھارت کے یوم جمہوریہ کو یوم سیاہ کے طورپر منائیں گے

سرینگر: کنٹرول لائن کے دونوں جانب اور دنیا بھر میں مقیم کشمیری کل بھارت کے یوم جمہوریہ کو یوم سیاہ کے طورپرمنائیں گے جس کا مقصدعالمی برادری کوباورکرانا ہے کہ بھارت کشمیریوں کو ان کا ناقابل تنسیخ حق، حق خود ارادیت دینے سے مسلسل انکار کر رہا ہے۔
کشمیرمیڈیاسروس کے مطابق یوم سیاہ منانے کی اپیل کل جماعتی حریت کانفرنس اوردیگر حریت تنظیموں نے کی ہے ۔اس دن مقبوضہ کشمیرمیں یوم سیاہ منایا جائے گااور آزاد کشمیر ، پاکستان اورمختلف ممالک کے دارلحکومتوں میں بھارت مخالف مظاہرے اور ریلیاں نکالی جائیں گی تاکہ عالمی برادری کو یہ پیغام دیا جاسکے کہ بھارت جس نے کشمیریوں کے تمام بنیادی حقوق سلب کر رکھے ہیں اوراسے مقبوضہ علاقے میں اپنا یوم جمہوریہ منانے کا کوئی حق حاصل نہیں ہے ۔
ادھر کل جماعتی حریت غیر قانونی طورپر نظربند چیئرمین مسرت عالم بٹ اور سینئر حریت رہنما شبیر احمد شاہ نے بھارت کی تہاڑ جیل سے جاری اپنے الگ الگ بیانات میں پورے مقبوضہ علاقے میں کل بھارتی یوم جمہوریہ کو یوم سیاہ کے طورپر منانے کی اپیل کا اعادہ کیاہے۔دیگر حریت رہنمائوں اور تنظیموں نے اپنے بیانات میں مقبوضہ علاقے میں خوف و دہشت کا ماحول قائم کرنے ، تلاشی اور محاصرے کی کارروائیوں ، گرفتاریوں اور تجارتی اور سماجی سرگرمیوں پر قدغن عائد کرنے پر بھارت کی شدید مذمت کی ہے ۔ انہوں نے کشمیریوں پر زور دیا کہ وہ تمام بھارتی یوم جمہوریہ کی تمام سرکاری تقریبات کا بائیکاٹ کریں تاکہ دنیا اور بھارت کو یہ واضح پیغام دیا جاسکے کہ کشمیری اپنے مادر وطن پر بھارت کے غیر قانونی قبضے کو مسترد کرتے ہیں اور اپنے حق خودارادیت کے حصول کے لیے جدوجہد ہر قیمت پرجاری رکھیں گے ۔کل جماعتی حریت کانفرنس کی رہنماء فریدہ بہن جی نے سرینگر میں ایک بیان میں مقبوضہ علاقے میں بڑھتے ہوئے مظالم پرسخت تشویش کا اظہار کیاہے۔ انہوں نے عالمی برادری سے اپیل کی کہ وہ نہتے کشمیریوں کو بھارتی مظالم سے نجات دلائے اور مسئلہ کشمیر کا اقوام متحدہ کی قراردادوں کے مطابق حل کرے۔اتحادالمسلمین کے ترجمان نے سرینگر میں جاری ایک بیان میں مقبوضہ کشمیرمیں اپنایوم جمہوریہ منانے پر بھارت پر کڑی تنقید کرتے ہوئے کہاہے کہ بھارت نے جموں وکشمیر پر فوجی طاقت کے بل پر قبضہ کر رکھا ہے اور اسے مقبوضہ علاقے میں اپنا یوم جمہوریہ منانے کا کوئی حق حاصل نہیں ہے ۔ انہوںنے کہاکہ کنٹرول لائن کے دونوں اطراف اور دنیا بھر میں مقیم کشمیری کل 26جنوری کو بھارتی یوم جمہوریہ کو یوم سیاہ کے طور پر مناکر اقوام عالم کی توجہ حل طلب دیرینہ تنازعہ کشمیر کی طرف مبذول کرائیں گے ۔
دریں اثناء کل جماعتی حریت کانفرنس آزاد کشمیرشاخ کے کنوینرمحمود احمد ساغراوردیگر رہنمائوں غلام محمد صفی، شیخ عبدالمتین، سید یوسف نسیم، زاہد اشرف ، رفیق احمد ڈار، امتیاز احمد وانی ، سید گلشن احمد،خالد شبیر،امتیاز احمد بٹ،عبدالرشید بٹ اور قاضی عمران نے اپنے بیانات میں کہا ہے کہ مقبوضہ جموں و کشمیر میں بھارتی فورسز کی تعیناتی غیر قانونی ، غیر آئینی اور بین الاقوامی قانون کی صریحا خلاف ورزی ہے۔انہوں نے کہاکہ کسی بھی قانون کے تحت بھارت مقبوضہ کشمیرمیں اپنے فوجیوں کی تعیناتی کا جواز پیش نہیں کر سکتا ۔