برسلز:علی رضا سید کی طرف سے سید علی گیلانی کو شاندار خراج عقیدت
برسلزیکم ستمبر (کے ایم ایس )
کشمیرکونسل ای یو کے چیئرمین علی رضا سید نے شہید سید علی گیلانی کو ان کے یوم شہادت پر شاندار خراج عقیدت پیش کیا ہے ۔انہوں نے کہاکہ سیدعلی گیلانی نے تحریک آزادی کشمیر کی خاطر اپنی زندگی کے دوران قید وبند کی طویل صعوبتیں برداشت کیں۔
سید علی گیلانی کی پہلی برسی کے موقع پر برسلز سے جاری ایک بیان میں علی رضا سید نے کہاکہ مشکلات کے باوجود علی گیلانی اپنے ارادوں میں مصمم رہے اور کشمیریوں کی بھرپور قیادت اور رہنمائی کی۔ انہوں نے کہاکہ سید علی گیلانی نے کشمیریوں کی نسلوں کو اپنی جدوجہد سے متاثر کیااور وہ کشمیریوں کے ہیرو اور کشمیر کی حقیقی آواز تھے۔ وہ اپنے اصولوں اور نظریات سے ایک لمحہ بھی پیچھے نہیں ہٹے۔انہوں نے کہاکہ سید علی گیلانی نے اپنے عظیم مقصد پر کبھی سمجھوتہ نہیں کیا اور کشمیریوں اور کشمیر کاز کے ساتھ غیرمشروط وابستگی اور محبت کی وجہ سے انہیں ہمیشہ یاد رکھا جائے گا۔انہوں نے کہاکہ علی گیلانی کی وفات سے کشمیری ایک عظیم اور پرعزم رہنما سے محروم ہوگئے لیکن ان کی رہنمائی اور جدوجہد کے اثرات طویل مدت تک باقی رہیں گے۔ ایسی عظیم شخصیات صدیوں بعد پیدا ہوتی ہیں۔انہوں نے کہاکہ سید علی گیلانی نے عمر بھر جموں و کشمیر کی بھارت سے آزادی کے لیے جدوجہد کی اور اپنے اصولوں پر ہمیشہ مصمم رہے۔ علی رضا سید نے مزید کہاکہ علی گیلانی پہاڑ کی طرح کشمیریوں کے حق خودارادیت کی حمایت میں اپنے عظیم موقف پر قائم رہے۔ ان کی یہ جدوجہد ناقابل فراموش ہے۔انہوں نے اللہ تعالیٰ کے حضور سید علی گیلانی کو جوار رحمت میں جگہ عطا فرمانے اور کشمیریوں کو ان کے نقش قدم پر چلنے کی توفیق عطا فرمانے کی بھی دعا کی ۔
