بھارت میں پولیس سٹیشن میں بند خاتون پر پولیس افسر کے بہیمانہ تشدد کی ویڈیو وائرل
کانپور27دسمبر(کے ایم ایس)بھارتی ریاست اترپردیش کے شہر کانپور میںپولیس کی ایک ویڈیو سوشل میڈیا پر وائرل ہوئی ہے جس میںایک پولیس افسر لاک اپ میں بند ایک خاتون پر بہیمانہ تشدد کرتا نظر آرہا ہے۔
کشمیرمیڈیاسروس کے مطابق سماج وادی پارٹی کے ٹویٹر اکائونٹ پر شیئر کی گئی اس ویڈیو سے لوگوں میں شدید غم و غصہ پایا جاتا ہے۔ویڈیو میںخاتون کو مدد کے لیے بھیک مانگتے ہوئے اور درد سے چیختے ہوئے دیکھا جاسکتا ہے ۔پولیس افسرجو کانپور کے علاقے کاکوان میں ایک سب انسپکٹر ہے، خاتون کوبے رحمی سے مارتا دکھائی دے رہا ہے۔سماج وادی پارٹی نے اس واقعے کی مذمت کرتے ہوئے پولیس افسر کی حرکتوں کی تحقیقات کا مطالبہ کیا ہے۔ایک ٹویٹ میں اس نے واقعے کی تحقیقات اور پولیس اہلکار کے خلاف سخت کارروائی کا مطالبہ کیا۔پولیس نے بھی ایک ٹویٹ میں کہاکہ کاکوان علاقے میں ایس آئی کی طرف سے ایک خاتون کے ساتھ بدسلوکی کے واقعے پر پولیس کمشنر نے فوری طور پر ڈی سی پی ویسٹ، ایڈیشنل ڈی سی پی ویسٹ اور ایڈیشنل ڈی سی پی سائوتھ کو تحقیقات کے لیے جائے وقوعہ پر بھیجا تاکہ حقائق کو سامنے لایا جاسکے۔ٹویٹ میں کہاگیا ہے کہ پولیس کی جانب سے تمام ضروری اقدامات کیے جا رہے ہیں تاکہ اس طرح کا واقعہ دوبارہ نہ ہو۔
