بھارت مذموم پروپیگنڈے کے ذریعے پاکستان کو بدنام کرنے کی کوشش کر رہا ہے

اسلام آباد28اگست(کے ایم ایس )بھارت مذموم پروپیگنڈے کا سہارا لے کر پاکستان اور کشمیریوں کی جدوجہد آزادی کو بدنام کرنے کی کوشش کر رہا ہے اور فسطائی مودی پاکستان اور کشمیریوں کی مقامی مزاحمتی تحریک کو بدنام کرنے کے لیے کوئی بھی ہتھکنڈااستعمال کر سکتا ہے۔
کشمیر میڈیا سروس کی جانب سے آج جاری کی گئی ایک رپورٹ میں کہا گیا ہے کہ مودی حکومت اس حدتک گرگئی ہے کہ پاکستان کو بدنام کرنے کے لیے ذہنی طور پر معذور ایک شخص کو دہشت گرد کے طور پر پیش کررہی ہے۔رپورٹ میں کہا گیا ہے کہ بھارت پاکستان کے خلاف پروپیگنڈے کے لئے آزاد جموں و کشمیر سے تعلق رکھنے والے ذہنی طورپر معذور ایک شخص تبارک حسین کی گرفتاری کو استعمال کر رہا ہے جس نے حال ہی میں نادانستہ طور پر کنٹرول لائن عبورکی تھی۔آزاد جموں و کشمیرمیں کوٹلی کے گائوں سبز کوٹ کے رہائشی تبارک حسین کو بھارتی فوجیوں نے اس وقت گولی مار کر زخمی حالت میں گرفتار کر لیا جب وہ چند روز قبل نادانستہ طور پرکنٹرول لائن عبور کرکے مقبوضہ جموںو کشمیر میں ضلع راجوری کے علاقے نوشہرہ پہنچ گیا تھا۔ رپورٹ میں افسوس کا اظہار کیا گیا کہ بھارتی فوجی کشمیریوں کوکنٹرول لائن کے قریب لاکر جعلی مقابلوں میںشہید کر رہے ہیں اور بعد میں انہیں پاکستانی عسکریت پسند کہہ کر پاکستان اور کشمیریوں کی تحریک آزادی کو بدنام کر رہے ہیں۔ رپورٹ میں کہاگیا کہ بھارت اپنے من پسند میڈیا کے ذریعے پاکستان اورکشمیریوں کی تحریک آزادی کی بری تصویر پیش کرنے کی کوشش کر رہا ہے۔رپورٹ میں کہا گیا کہ بھارت پاکستان اور کشمیریوں کی تحریک آزادی کے خلاف بے بنیاد پروپیگنڈہ کرنے کا عادی ہے اور اس نے جھوٹے بیانیے، من گھڑت شواہد اور جعلی مقابلوں کے ذریعے پاکستان مخالف مہم کو تیز کردیا ہے۔رپورٹ میں کہا گیا ہے کہ بھارت دہشت گردی کی ریاستی سرپرستی کررہا ہے، پاکستان دشمن پروپیگنڈے کو فروغ دے رہاہے لیکن وہ پاکستان اور کشمیر کی جدوجہد آزادی کو بدنام کرنے کی اپنی سازشوں میں ضرور ناکام ہو گا کیونکہ پاکستانی اور کشمیری اپنے خلاف بھارت کی ہائبرڈ جنگی حکمت عملی کو ناکام بنانے کے لیے پرعزم ہیں۔