بھارت :یوپی میں بھارتی پولیس اہلکار نے استاد کو گولی مار کرقتل کر دیا

لکھنو: بھارت میں بی جے پی کے زیر اقتدار ریاست اتر پردیش میں ایک پولیس اہلکار نے ایک استاد کو گولی مار کرقتل کر دیا۔
کشمیر میڈیا سروس کے مطابق استاد دھرمیندر کمار کو پولیس کے ایک ہیڈ کانسٹیبل نے ریاست میں ضلع مظفر نگر کے علاقے سول لائنز میں گولی مار کر قتل کر دیا۔پولیس سپرانٹنڈنٹ ستیہ نارائن پرجاپت نے بتایا کہ مذکورہ استاد وارانسی سے محکمہ تعلیم کی اس ٹیم کا حصہ تھا جو مظفر نگر کے ایک کالج میں اتر پردیش بورڈ کے امتحان کے جوابی پرچے لے کر آئی تھی۔انہوں نے کہا کہ ہیڈ کانسٹیبل چندر پرکاش اس پولیس ٹیم کا حصہ تھا جو وارانسی سے کمار اور دیگرافسروں کے ساتھ تھی۔پولیس افسر نے بتایا کہ جب یہ واقعہ پیش آیا تو وہ گاڑی میں کالج کا گیٹ کھلنے کا انتظار کر رہے تھے۔ گاڑی میں کماراور چندر پرکاش کے درمیان توتو میں میں ہوئی۔ افسر نے بتایا کہ پولیس کانسٹیبل نے اپنے سروس ہتھیار کا استعمال کرتے ہوئے کمار پر گولی چلائی۔