بھارت :این ڈی اے حکومت میں مسلم دشمن مہم کو برداشت نہیں کریں گے: جے ڈی یو
نئ
ی دہلی:بھارت میں قومی جمہوری اتحاد(این ڈی اے ) کی حکومت میں شامل جنتا دل یونائیٹڈ نے اعلان کیا ہے کہ ان کی پارٹی این ڈی اے حکومت کا حصہ ہونے کے ناطے ہر قسم کی مسلم دشمن یا اقلیت دشمن مہم کی سختی سے مخالفت کرے گی۔
کشمیرمیڈیاسروس کے مطابق جنتا دل یونائیٹڈ کے ترجمان کے سی تیاگی نے یہ بیان حالیہ پارلیمانی انتخابات کے دوران بھارتیہ جنتا پارٹی کی بیان بازی خاص طور پر وزیر اعظم نریندر مودی کی طرف سے مسلمانوں کو نشانہ بنائے جانے کے باعث بڑھتے ہوئے خدشات کے پیش نظردیا ہے۔ کے سی تیاگی نے مسلمانوں میں جے ڈی یو کی ساکھ کا حوالہ دیتے ہوئے نئی انتظامیہ میں اقلیتی برادریوں کے خلاف کسی قسم کی تفرقہ انگیز کارروائیوں کو روکنے کا عزم ظاہر کیا۔مسلم اکثریتی علاقوں میں جے ڈی یو کی نمایاں حمایت کی طرف توجہ مبذول کرتے ہوئے تیاگی نے کشن گنج حلقے کی طرف اشارہ کیا جہاں جے ڈی یو امیدوار نے آل انڈیا مجلس اتحاد المسلمین کو پیچھے چھوڑتے ہوئے دوسری پوزیشن حاصل کی۔ انہوں نے کہاکہ یہ مسلم ووٹروں میں نتیش کمار کی مقبولیت کا ثبوت ہے۔بی جے پی کی زیر قیادت این ڈی اے نے 2024کے پارلیمانی انتخابات میں کامیابی حاصل کرلی ہے۔بی جے پی واضح اکثریت سے محروم ہونے کے باوجود نتیش کمار کی جے ڈی یو اور این چندرابابو نائیڈو کی تیلگو دیشم پارٹی جیسے اتحادیوں کی حمایت سے حکومت بنانے میں کامیاب ہوئی ہے۔
