تلنگانہ :بس الٹنے کے بعد آگ لگنے سے خاتون جل کر ہلاک

حیدرآباد:بھارتی ریاست تلنگانہ میں بس میں آگ لگنے سے ایک خاتون جل کر ہلاک اور چار دیگر مسافرجھلس کر زخمی ہو گئے۔
کشمیرمیڈیاسروس کے مطابق یہ واقعہ حیدرآباد-بنگلور قومی شاہراہ پر آج (ہفتہ ) علی الصبح ضلع جوگلامبا گڈوال میں ایراویلی چوراہے کے قریب پیش آیا۔
حیدرآباد سے چتور جانے والی ایک نجی ٹریول کمپنی کی بس سڑک پر الٹ گئی اور اس میں آگ بھرک اٹھی۔ بس میں50 کے قریب مسافر سوار تھے۔ بیشتر مسافر کھڑکیوں کے شیشے توڑ کر باہر کود پڑے، ایک خاتون آگ کی لپیٹ میں آگئی اور جل کر ہلاک ہوگئی۔
حادثے میں چار مسافر زخمی بھی ہوئے جنہیں ہسپتال میں داخل کرایا گیا۔بس مکمل طور پر جل گئی۔ پولیس نے شبہ ظاہر کیا ہے کہ بس کو یہ حادثہ ڈرائیور کو نیند آنے کے سبب پیش آیا ہوگا۔ اس نے مقدمہ درج کر کے مزید تفتیش شروع کردی ہے ۔