غلام محمد بھلہ کی شہادت پر پورا جموں وکشمیر آزادی اور حق خودارادیت کے نعروں سے گونج اٹھا: فاروق رحمانی
اسلام آباد: کل جماعتی حریت کانفرنس کی آزادجموں وکشمیر شاخ کے سینئر رہنما اورپیپلز فریڈم لیگ کے چیئرمین محمد فاروق رحمانی نے شہید غلام محمد بھلہ کو ان کے 50ویں یوم شہادت پر زبردست خراج عقیدت پیش کیا ہے۔
کشمیرمیڈیاسروس کے مطابق محمد فاروق رحمانی نے اسلام آباد میں جاری ایک بیان میں کہاکہ 1975 میںاندرا عبداللہ معاہدے کے منظر عام پر آنے کے بعد مقبوضہ جموں وکشمیر کے کونے کونے میں ہنگامے شروع ہوگئے اورقابض حکومت نے بڑے پیمانے پر گرفتاریاں شروع کیں۔انہوں نے کہاکہ وادی کشمیر کے دیگر علاقوں کی طرح سوپور میں ہونے والے احتجاجی مظاہرے کے دوران کئی نوجوانوں کو پکڑکرجیل میں بند کیا گیا جن میں غلام محمد بھلہ بھی شامل تھے، جن کو سنٹرل جیل سرینگر کے شہید کی حیثیت سے جانا جا تا ہے۔ انہوں نے کہاکہ غلام محمد بھلہ کو گرفتاری کے بعد پہلے سوپور کے تھانے میں تشد د کا نشانہ بنا یا گیا۔ اس کے بعد انہیں زخمی حالت میں سنٹرل جیل سرینگر منتقل کیا گیاجہاں ان پر مزید تشدد کیاگیا، یہاں تک کہ وہ 14اور 15فروری 1975کی درمیانی رات جام شہادت نوش کرگئے۔ شہید موصوف کی میت کو پولیس نے راتوں رات اپنی تحویل میں سوپور پہنچایا اور اپنی نگرانی میںقبر کھودوا کر خاموشی سے سوپور ڈگری کالج کے سامنے دفن کرایا۔محمد فاروق رحمانی نے کہاکہ15فروری کو بھلہ کی شہادت کی خبر نے کشمیر میں کہرام مچادیا اور جگہ جگہ اندرا عبداللہ معاہدے کے خلاف وسیع پیمانے پر مظاہرے ہوئے اور پورا جموں وکشمیر آزادی اور حق خودارادیت کے نعروں سے گونج اٹھا۔انہوں نے کہاکہ کشمیری اپنے مقصد میں اسی وقت کامیاب ہوں گے جب وہ اپنی قومی اور اجتماعی خودی کو پہچان لیں گے اور دنیا کو یہ بتانے میں کامیاب ہونگے کہ ہم وہی حق مانگ رہے ہیں جو اقوام عالم میں دیگر قوموں کو حاصل ہے۔ حریت رہنما نے کہاکہ سنٹرل جیل میں قتل کئے گئے شہید غلام محمدبھلہ اور تہاڑ جیل میں سولی چڑھائے گئے شہید محمد مقبول بٹ اور شہید محمد افضل گورو کو خراج عقیدت پیش کرنے کا بہترین طریقہ یہ ہے کہ ان کے ادھورے مشن کومنطقی انجام تک جاری رکھا جائے۔
