پاک بھارت جنگ بندی میں صدر ٹرمپ کا کردار نہ ہونے سے متعلق مودی حکومت کا دعویٰ جھوٹا قرار
واشنگٹن: امریکا نے پاک بھارت جنگ بندی میں صدر ٹرمپ کا کردار نہ ہونے سے متعلق مودی کا دعویٰ جھوٹے قراردیدیا۔
کشمیر میڈیا سروس کے مطابق ترجمان امریکی محکمہ خارجہ ٹیمی بروس نے پریس بریفنگ کے دوران کہا کہ اکثر تبصرے خود اپنی وضاحت کردیتے ہیں، حقیقت جاننے کے لیے جدید دور میں آپ کسی ایک تبصرے پر انحصار نہیں کرتے۔
ترجمان نے کہا کہ بعض لوگوں کی رائے غلط ہوتی ہے، صدرٹرمپ نے جنگ بندی کا کام آسان بنا دیا ۔
امریکی محکمہ خارجہ کی ترجمان کا کہنا تھا کہ نائب صدر جے ڈی وینس بھی پاک بھارت جنگ بندی کے معاملے میں شریک تھے ۔
واضح رہے کہ پاک بھارت جنگ بندی میں امریکی صدر ڈونلڈ ٹرمپ متعدد مرتبہ کردار ادا کرنے کا دعویٰ کرچکے ہیں جب کہ بھارتی حکومت اس حوالے سے مسلسل امریکی کردار کو مسترد کرتی آئی ہے۔
پاکستان نے پاک بھارت جنگ بندی میں اہم کردار ادا کرنے پر امریکی صدر کو امن کے نوبیل انعام کے لیے بھی نامزد کیا ہے۔
