بھارتی عازمین حج کو مکہ مکرمہ میں غیر معیاری رہائش، ناقص انتظامات کا سامنا
مکہ مکرمہ :مکہ مکرمہ کے علاقے عزیزیہ میں مقیم بھارتی عازمین حج کو غیر معیاری رہائش اورناقص انتظامات کا سامنا ہے۔
کشمیر میڈیا سروس کے مطابق یہ معاملہ اس وقت اہمیت اختیارکرگیاجب عام آدمی پارٹی کے رکن پارلیمنٹسنجے سنگھ نے ایکس پر ایک ویڈیو شیئر کی جس میں عازمین حج کے زیر استعمال عمارت کی ابتر حالت کودیکھا جاسکتا ہے۔ویڈیو میں کمروں کے اندرجمع گندا پانی ، باتھ رومز سے رستا ہواپانی، گندے بیت الخلاءاور جگہ کی کمی کو دیکھا جاسکتا ہے۔بھارتی عازمین حج جن میں بہت سے عمر رسیدہ افراد شامل ہیں، شکایت کرتے نظر آتے ہیں کہ مطلوبہ فیس ادا کرنے کے باوجود انہیں اس طرح کی صورتحال کے بارے میں آگاہ نہیں کیاگیا۔انہوں نے فوری طورپر بہتر سہولیات کی فراہمی یا پاسپورٹوں کی واپسی کا مطالبہ کرتے ہوئے کہا کہ یہ صورتحال ان کے نماز کے لیے حرم جانے میں رکاوٹ ہے۔رواں سال1.75 لاکھ سے زائد بھارتی حج کی سعادت حاصل کریں گے۔
