پہلگام واقعے میں ملوث حملہ آور پاکستانی نہیں بھارتی شہری تھے: سابق وزیر داخلہ پی چدمبرم
نئی دہلی :بھارت کے سابق وزیر داخلہ پی چدمبرم نے پہلگام حملے کے حوالے سے تہلکہ خیز انکشاف کرتے ہوئے کہا ہے کہ اس واقعے میں پاکستان کے ملوث ہونے کا کوئی ثبوت موجود نہیں، بلکہ حملہ آور دراصل بھارتی شہری تھے جنہوں نے بھارت کے اندر ہی تربیت حاصل کی۔
کشمیرمیڈیاسروس کے مطابق پی چدمبرم نے بھارتی میڈیا کو انٹرویو دیتے ہوئے کہا کہ حکومت بغیر کسی ثبوت کے یہ فرض کیوں کر رہی ہے کہ حملہ آور پاکستان سے آئے تھے؟ اگر ایسا ہے تو ثبوت کیوں نہیں پیش کیے گئے؟ انہوں نے کہا کہ اب تک نہ تو حملہ آوروں کو شناخت کیا گیا اور نہ ہی کوئی واضح گرفتاری سامنے آئی۔مقبوضہ جموں وکشمیر کے سیاحتی علاقے پہلگام میں اپریل 2025میں ہونے والے اس حملے میں 26افراد ہلاک ہوئے تھے جس کے بعد بھارت نے آپریشن سندور کے نام سے جوابی کارروائی کا آغاز کیا لیکن تین ماہ گزرنے کے باوجود تحقیقات مکمل نہ ہو سکی۔چدمبرم کے انکشاف کے بعد بھارت کی جانب سے پاکستان پر لگائے گئے الزامات پر سوالیہ نشان لگ گیا ہے۔ یاد رہے کہ پاکستان نے نہ صرف اس حملے کی شدید مذمت کی تھی بلکہ شفاف اور مشترکہ تحقیقات کے لیے تعاون کی بھی پیشکش کی تھی۔
