مقبوضہ کشمیر: محبوبہ مفتی کا زرعی اراضی پر تجارتی کثیر المنزلہ عمارتوں کی تعمیر پر اظہارِ تشویش
سری نگر:
بھارت کے غیر قانونی زیر قبضہ جموں و کشمیر میں پیپلز ڈیموکریٹک پارٹی (پی ڈی پی) کی صدر محبوبہ مفتی نے علاقے میں تجارتی کثیر المنزلہ عمارتوں کی تعمیر کے لیے زرعی اور باغات کی اراضی کے استعمال پر تشویش کا اظہار کیا ہے۔ انہوں نے خبردار کیا کہ اس قسم کی تعمیرات غذائی تحفظ کے لیے خطرہ بن سکتی ہیں اور لوگوں کو زلزلے سے متعلق سنگین خطرات سے دوچار کر سکتی ہیں۔
محبوبہ مفتی نے سوشل میڈیا پلیٹ فارم ایکس پر ایک پوسٹ میں انتظامیہ کے ترقیاتی منصوبوں پر سوال اٹھاتے ہوئے کہا کہ زلزلے کے خطرات سے متعلق انتباہات کے باوجود زرعی اور باغبانی کی زمین کو تجارتی تعمیرات کے لیے استعمال کیا جا رہا ہے۔
انہوں نے کہا، ’’یہ ترقی نہیں ہے بلکہ ہماری زمین، ہمارے غذائی تحفظ اور ہمارے لوگوں کی زندگیوں کے ساتھ ایک خطرناک دھوکہ دہی ہے۔ جب یہ غیر محتاط اقدام کسی آفت کی شکل اختیار کر لے گا تو ذمہ داری کون لے گا؟‘‘
