ایلون مسک کی کمپنی ’ایکس‘ نے مودی حکومت کے خلاف مقدمہ درج کر لیا
بنگلورو:ایلون مسک کی ملکیت والی سوشل میڈیا کمپنی”ایکس“(سابقہ ٹویٹر)نے بھارتی حکومت کے خلاف ریاست کرناٹک کی ہائی کورٹ میں مقدمہ دائر کر دیا ہے۔ کمپنی کا کہنا ہے کہ بھارتی حکومت انفارمیشن ٹیکنالوجی (آئی ٹی) ایکٹ 2000کی دفعہ 79۔3(بی) کا غیر قانونی استعمال کر رہی ہے اور پلیٹ فارم پر موجود مواد کو بلاک کر کے سینسر شپ نافذ کر رہی ہے۔
کشمیر میڈیاسروس کے مطابق کمپنی نے کہا کہ مذکورہ دفعہ کے تحت بھارتی حکومت کو مخصوص حالات میں مواد ہٹانے یا بلاک کرنے کا اختیار حاصل ہے لیکن وہ اس دفعہ کا غلط استعمال کر رہی ہے ۔ ایکس کا کہنا کہ حکومت کی طرف سے دیے جانے والے احکامات میں وجوہات واضح نہیں کی جاتیں اور نہ ہی پلیٹ فارم کو مناسب سماعت کا موقع دیا جاتا ہے جو کہ قانونی اصولوں کے خلاف ہے۔ ایکس نے اپنی درخواست میں کہا کہ بھارتی حکومت کے احکامات انفارمیشن ٹیکنالوجی ایکٹ کی دفعہ 69کے مطابق نہیں ہیں جس میں مواد ہٹانے کے مخصوص ضوا بط درج ہیں۔
کمپنی نے سپریم کورٹ کے 2015کے شریا سنگھل کیس کا حوالہ دیتے ہوئے کہا کہ عدالت نے واضح کیا تھا کہ مواد ہٹانے کیلئے شفافیت اور معقولیت ضروری ہے لیکن حکومت ان اصولوں کی خلاف ورزی کر رہی ہے۔
