بھارتی نیوی کے 8افسران قطر میں گرفتار
دوحہ 28اکتوبر (کے ایم ایس )
ایک کمانڈر سمیت بھارتی بحریہ کے 8ریٹائر افسران کو قطر میں گرفتار کرلیا گیاہے۔
کشمیرمیڈیاسروس کے مطابق قطر کی ایک نجی کمپنی کیلئے کام کرنے والے بھارتی بحریہ کے ان افسران کی قطر میں گرفتاری کا معاملہ ایک ٹوئٹر صارف ڈاکٹر میتو بھرگوا کی ٹوئٹ کے بعد سامنے آیا ۔انہوں نے ٹوئٹ میں کہاہے کہ ریٹائر نیوی افسران 57دنوں سے دوحہ میں حراست میں ہیں۔ انہوں نے ٹوئٹ میں بھارتی وزیراعظم مودی، وزیر خارجہ جے شنکر اور وزیر دفاع راج ناتھ سنگھ کو بھی ٹیگ کیاہے اور ان سے نیوی افسران کی رہائی کامطالبہ کیا ہے ۔بھارتی اخبار انڈین ایکسپریس کی رپورٹ کے مطابق سابق نیوی افسران ایک قطری کمپنی کے لیے کام کرتے تھے جو خود کو قطر کے دفاع، سیکیورٹی اور دیگر سرکاری ایجنسیز کا شراکت دار بتاتی ہے۔اخبار کے مطابق بھارتی نیوی کے سابق افسران کی گرفتاری کی وجوہات اوران پر لگائے گئے الزامات کے بارے میں معلومات نہیں مل سکی ہیں۔ گرفتارنیوی افسران کو دوحہ میں موجود بھارتی سفارتی مشن نے رواں ماہ کے آغاز میں قونصلر رسائی فراہم کی تھی۔
